انسداد دہشت گردی عدالت اسلام آباد میں 26 نومبر 2022 کو ہونے والے احتجاج کے حوالے سے پاکستان تحریک انصاف (پی ٹی آئی) کارکنان کے خلاف درج مقدمات کی سماعت کے دوران مسلسل غیر حاضر ملزمان کو اشتہاری قرار دینے کا عمل شروع کر دیا گیا ہے۔ عدالت نے وارنٹ گرفتاری بھی جاری کر دیے ہیں۔
نجی ٹی وی چینل (سما نیوز)انسداد دہشت گردی عدالت (اے ٹی سی) کے ڈیوٹی جج ابوالحسنات محمد ذوالقرنین نے مختلف تھانوں میں درج مقدمات کی الگ الگ سماعت کی۔
تھانہ شہزاد ٹاؤن کے مقدمے میں کوئی بھی ملزم عدالت میں پیش نہیں ہوا، جس پر عدالت نے مقدمے کی سماعت 8 ستمبر 2025 تک ملتوی کر دی۔
دوسری جانب تھانہ کھنہ کے مقدمے میں 22 ملزمان عدالت میں پیش ہوئے، جن کی حاضری لگانے کے بعد عدالت نے کیس کی مزید سماعت 5 ستمبر 2025 تک ملتوی کر دی۔
اسی طرح تھانہ آبپارہ کے مقدمے میں 21 ملزمان عدالت میں پیش ہوئے، جنہیں چالان کی نقول فراہم کر دی گئیں۔ عدالت نے اس مقدمے کی سماعت 4 ستمبر 2025 تک مؤخر کر دی۔
یاد رہے کہ 26 نومبر 2022 کو پی ٹی آئی کی جانب سے اسلام آباد میں حکومت کے خلاف احتجاج کیا گیا تھا، جس کے دوران مختلف علاقوں میں تصادم، توڑ پھوڑ اور رکاوٹیں کھڑی کرنے کے الزامات کے تحت تھانہ شہزاد ٹاؤن، تھانہ کھنہ اور تھانہ آبپارہ میں علیحدہ علیحدہ مقدمات درج کیے گئے تھے۔
عدالتی ذرائع کے مطابق، بارہا نوٹسز اور طلبی کے باوجود غیر حاضر رہنے والے ملزمان کے خلاف قانونی کارروائی مزید تیز کی جائے گی۔
