نادرا نے شہریوں کی سہولت کے لیے پاک آئی ڈی موبائل ایپ کے ذریعے فیملی رجسٹریشن سرٹیفکیٹ حاصل کرنے کی سہولت فراہم کر دی ہے جس کے ذریعے اب صارفین گھر بیٹھے چند آسان مراحل میں اپنا مطلوبہ سرٹیفکیٹ حاصل کر سکیں گے۔
نادرا کی جانب سے جاری کردہ آگاہی پیغام کے مطابق اس سروس کے استعمال کے لیے شہریوں کو سب سے پہلے پاک آئی ڈی ایپ ڈاؤن لوڈ کرنا ہوگی جس کے بعد وہ ایف آر سی سروس کا انتخاب کر کے اپنی مطلوبہ معلومات درج کر سکیں گے۔
اعلامیے میں یہ واضح کیا گیا ہے کہ اس سہولت کا بنیادی مقصد عوام کو دفاتر کے چکروں سے بچانا اور شناختی دستاویزات کے حصول کے عمل کو مزید شفاف اور آسان بنانا ہے تاکہ وقت کی بچت ممکن ہو سکے۔
نادرا حکام نے مزید بتایا ہے کہ شہری اس حوالے سے رہنمائی کے لیے ویب سائٹ سے رجوع کر سکتے ہیں جبکہ موبائل صارفین کی مدد کے لیے ہیلپ لائن 1777 بھی چوبیس گھنٹے دستیاب رہے گی۔
