فرانس میں بچوں کی ذہنی صحت اور سوشل میڈیا کے منفی اثرات کے حوالے سے اہم اقدام اٹھاتے ہوئے 15 سال سے کم عمر بچوں کے لیے سوشل میڈیا کے استعمال پر پابندی کا قانون منظور کر لیا گیا ہے۔
بین الاقوامی میڈیا رپورٹس کے مطابق اس نئے قانون پر عمل درآمد کا آغاز جنوری 2027ء سے ہوگا، جس کے بعد 15 سال سے کم عمر افراد کو کسی بھی سوشل میڈیا پلیٹ فارم کے استعمال کی اجازت نہیں ہوگی۔
اس فیصلے کے ساتھ ہی فرانس کم عمر افراد کی سوشل میڈیا تک رسائی محدود کرنے والا پہلا یورپی ملک بن جائے گا۔
منظور کیے گئے قانون کی رو سے فرانس میں تمام سوشل میڈیا صارفین کے لیے عمر کی تصدیق کا عمل لازمی قرار دیا گیا ہے تاکہ کم عمر بچوں کی ان پلیٹ فارمز تک رسائی کو مؤثر انداز میں روکا جا سکے۔
میڈیا رپورٹس میں واضح کیا گیا ہے کہ یہ فیصلہ بچوں کی ذہنی صحت اور نفسیاتی بہبود پر سوشل میڈیا کے بڑھتے ہوئے منفی اثرات کے پیشِ نظر کیا گیا ہے۔
یہ بھی پڑھیں : سوشل میڈیا کا بے لگام استعمال اور کم عمر بچے،سینئر صحافی ندیم ملک نے خطرے کی گھنٹی بجا دی
دوسری جانب برطانیہ اور یورپی یونین کے دیگر ممالک بھی اپنے ہاں بچوں کے لیے اسی نوعیت کی پابندیاں عائد کرنے پر غور کر رہے ہیں۔
