فیڈرل بورڈ آف ریونیو (ایف بی آر) نے خصوصی ٹیکس اسکیم کے تحت چھوٹے دکانداروں اور تاجروں کے لیے ٹیکس گوشوارے جمع کرانے کا طریقہ کار مزید آسان اور مختصر کر دیا ہے۔
ایف بی آر حکام کے مطابق چھوٹے دکاندار اب اردو اور دیگر علاقائی زبانوں میں صرف ایک صفحے پر مشتمل انتہائی سادہ فارم پُر کر کے اپنے ٹیکس گوشوارے جمع کرا سکتے ہیں۔ اس اقدام کا بنیادی مقصد چھوٹے کاروباری افراد کو پیچیدہ کاغذی کارروائی سے بچانا اور انہیں باقاعدہ ٹیکس نیٹ کا حصہ بننے کی ترغیب دینا ہے۔
حکام کا کہنا ہے کہ فائلنگ کی اس سہولت سے فائدے کے لیے دکاندار ایف بی آر کی رسمی ویب سائٹ، آسان موبائل ایپ یا اپنے قریبی ٹیکس دفتری مرکز سے رجوع کر سکتے ہیں۔
یہ بھی پڑھیں : وادی کالام کے بلند پہاڑوں پر برفباری،سردی کی شدت میں اضافہ
ایف بی آر نے تاجر برادری پر زور دیا ہے کہ وہ اس خصوصی اسکیم کا فائدہ اٹھاتے ہوئے اپنے کاروبار کو باقاعدہ نظام کا حصہ بنائیں تاکہ غیر ضروری قانونی الجھنوں اور نوٹسز سے بچا جا سکے۔
