اوپن اے آئی نے چیٹ جی پی ٹی کا جدید ترین ماڈل جی پی ٹی-6 متعارف کرا دیا ہے، جسے ’آسٹرا‘ کا نام دیا گیا ہے۔
کمپنی کے مطابق نئے ماڈل نے ابتدائی ٹیسٹنگ کے دوران بعض غیر متوقع رویوں کا مظاہرہ کیا، تاہم اسے مزید جدید صلاحیتوں اور بہتر کارکردگی کے ساتھ متعارف کرایا گیا ہے۔
اوپن اے آئی کا دعویٰ ہے کہ آسٹرا نے کارکردگی کے مختلف پیمانوں پر اینتھروپک کے کلاؤڈ اور گوگل کے جیمینائی سمیت دیگر بڑے اے آئی ماڈلز کو پیچھے چھوڑ دیا ہے۔
کمپنی کے مطابق جی پی ٹی-6 آسٹرا کمپیوٹر استعمال، ویب براؤزنگ، سافٹ ویئر انجینئرنگ، سائبر سیکیورٹی، سائنسی تحقیق اور مختلف پیشہ ورانہ امور میں جدید صلاحیتوں کا مظاہرہ کرسکتا ہے۔
اوپن اے آئی کے مطابق ایک مظاہرے میں آسٹرا نے بیک وقت صارف کی متعدد درخواستوں پر کام کرتے ہوئے پیچیدہ کام انجام دیے، جن میں قانونی معاہدہ تیار کرنا اور ویڈیو گیم بنانا بھی شامل تھا۔
یہ بھی پڑھیں: اے آئی کا غلط استعمال ڈیپ فیک کی صورت میں لوگوں کیلئے ایک نیا خطرہ
کمپنی کا کہنا ہے کہ نئے ماڈل کا مقصد صارفین کو زیادہ پیچیدہ اور عملی نوعیت کے کام مصنوعی ذہانت کی مدد سے انجام دینے کی بہتر سہولت فراہم کرنا ہے۔
