سیالکوٹ : وزیر دفاع خواجہ آصف نے یونیورسٹی آف سینٹرل پنجاب کے سالانہ کانووکیشن سے خطاب کرتے ہوئے کہا کہ اللہ کے فضل و کرم سے پاکستان نے اپنے سے پانچ گنے بڑے دشمن کو شکست دے کر دنیا میں اپنی عسکری صلاحیت اور طاقت منوائی ہے، اور اس کامیابی کو بھارت نے بھی تسلیم کیا ہے۔
دہشت گردی کے خلاف مسلح افواج کی قربانیاں
انہوں نے واضح کیا کہ پاکستان کی مسلح افواج گزشتہ کئی برسوں سے دہشت گردی کے خلاف نبردآزما ہیں اور اپنے خون کا نذرانہ پیش کر کے ملک کی آزادی اور سلامتی کا بھرپور تحفظ کر رہی ہیں۔
بیرونی فوجی اڈے اور ملکی خودمختاری
خواجہ آصف کا کہنا تھا کہ بیرونی طاقتوں کے فوجی اڈے لازماً متعلقہ ملکوں کے تحفظ کے لیے نہیں ہوتے بلکہ ان سے ان کے اپنے مفادات وابستہ ہوتے ہیں، اور کسی بھی ملک کی حقیقی حفاظت کا اصل ذریعہ اس کی اپنی داخلی طاقت اور صلاحیت ہوتی ہے۔
یہ بھی پڑھیں : سہیل آفریدی کے خلاف گھیرا تنگ، کرپشن کی چارج شیٹ تیار، جلد حقائق عوام کے سامنے لائیں گے، ثمر ہارون بلور
قومی ناکامیوں کی ذمہ داری اور سیاسی نظام
انہوں نے اس بات کا اعتراف کیا کہ گزشتہ کئی دہائیوں میں قومی سطح پر ہونے والی ناکامیوں میں تمام سیاستدانوں کا حصہ ہے اور وہ خود کو اس نظام سے الگ یا بے قصور قرار نہیں دیتے۔
انہوں نے یہ بھی ذکر کیا کہ ملکی سیاسی تاریخ میں بعض اوقات پہلے افراد کو گرفتار کیا جاتا ہے اور بعد میں الزامات تلاش کیے جاتے ہیں۔
طویل سیاسی سفر اور عوامی اعتماد
اپنے سیاسی پس منظر کا ذکر کرتے ہوئے انہوں نے بتایا کہ انہوں نے تقریباً 21 سال بینکاری کے شعبے میں کام کیا، 1991 میں عملی سیاست میں قدم رکھا، اور سیالکوٹ کے عوام گزشتہ 36 سالوں سے ان پر اعتماد کا اظہار کر رہے ہیں۔
