وفاقی دارالحکومت کے سب سے بڑے سرکاری ہسپتال پمز (PIMS) میں اس وقت جذباتی اور سنسنی خیز مناظر دیکھنے کو ملے جب وفاقی وزیر اطلاعات و نشریات عطا اللہ تارڑ اچانک زیر علاج سینئر صحافی محمد اسلم کھوکھر کی عیادت کے لیے پہنچ گئے۔
وفاقی وزیر نے نہ صرف زیر علاج صحافی کی خیریت دریافت کی بلکہ ہسپتال میں موجود ماہر معالجین اور ڈاکٹروں کی ٹیم کو طلب کر کے ان کے جاری علاج معالجے اور طبی نگہداشت کی پل پل کی رپورٹ حاصل کی۔
عیادت کے اس انتہائی حساس اور جذباتی موقع پر عطا اللہ تارڑ نے ایک ایسا شاندار اور غیر متوقع اقدام کیا جس نے وہاں موجود تمام افراد کو ورطہ حیرت میں ڈال دیا۔
وفاقی وزیر نے ہسپتال کے بستر پر زیر علاج صحافی محمد اسلم کھوکھر کو سرکاری ملازمت کی فراہمی کا باقاعدہ لیٹر اپنے ہاتھوں سے ان کے حوالے کیا، ان کے لیے نیک تمناؤں کا اظہار کیا اور ان کی جلد اور مکمل صحت یابی کی دعا کی۔
اس موقع پر میڈیا سے گفتگو کرتے ہوئے اور اپنے پختہ عزم کا اعادہ کرتے ہوئے وفاقی وزیر اطلاعات عطا اللہ تارڑ کا کہنا تھا کہ مشکل اور آزمائش کی اس گھڑی میں حکومت اپنے کسی صحافی بھائی کو سڑک پر یا تنہا نہیں چھوڑے گی۔
یہ بھی پڑھیں : عالمی مارکیٹ میں تیل کی قیمتوں میں بڑی کمی
انہوں نے کہاہم صحافی برادری کے درپیش مسائل اور تمام تر مشکلات میں ان کے ساتھ سیسہ پلائی دیوار کی طرح کھڑے ہیں اور ان کی فلاح و بہبود، روزگار اور علاج معالجے کے لیے حکومتی سطح پر ہر ممکن تعاون اور امداد کا سلسلہ اسی طرح بلا تعطل جاری رکھا جائے گا۔
