وفاقی وزیر پارلیمانی امور ڈاکٹر طارق فضل چوہدری نے واضح کیا ہے کہ بانی پی ٹی آئی عمران خان کی رہائی کا حل صرف اور صرف عدالتوں کے پاس ہے اور حکومت کے پاس اس سلسلے میں نہ کوئی ڈیل موجود ہے اور نہ ہی کوئی ڈھیل۔
پارلیمنٹ ہاؤس کے باہر ذرائع ابلاغ سے بات چیت کرتے ہوئے وفاقی وزیر نے بتایا کہ بانی پی ٹی آئی کو طبی دیکھ بھال اور معائنے کی تمام تر سہولیات فراہم کی جا رہی ہیں۔
انہوں نے بیرسٹر سلمان صفدر کے بیان پر تبصرہ کرتے ہوئے کہا کہ وہ پیشے کے اعتبار سے وکیل ہیں لیکن میڈیا کے سامنے طبی ماہر بن کر باتیں کر رہے تھے۔ اگر وہ قانونی نکات پر اپنی توجہ مرکوز رکھیں تو ان کے موکل کے لیے قانونی بہتری کی کوئی راہ نکل سکتی ہے۔ سلمان صفدر نے خود بھی اس بات کی تصدیق کی ہے کہ بانی پی ٹی آئی کو طبی معائنے کی سہولت حاصل ہے۔
ڈاکٹر طارق فضل چوہدری کا کہنا تھا کہ حکومت نے بانی تحریک انصاف کے علاج معالجے میں کبھی غفلت کا مظاہرہ نہیں کیا اور نہ ہی مستقبل میں ایسا ہوگا۔ سپریم کورٹ کے حکم سے پہلے بھی انہیں چھ مرتبہ اسپتال منتقل کیا جا چکا تھا جبکہ بلڈ پریشر کی پیچیدگی پر ان کی ضرورت کے مطابق لندن سے ماہر معالجین کی خدمات بھی حاصل کی گئی تھیں۔ عمران خان کو وہی تمام طبی سہولیات دی گئی ہیں جو ان کے لیے ضروری تھیں۔
وفاقی وزیر نے کہا کہ خیبرپختونخوا میں پی ٹی آئی کی 13 سالہ حکمرانی عوامی سہولیات اور ترقی کے لحاظ سے بدترین دور ثابت ہوئی۔ انہوں نے کہا کہ جب تک خیبرپختونخوا میں مقررہ اہداف حاصل نہیں ہو جاتے، وہاں ایمرجنسی نافذ رہے گی کیونکہ حکومت کے پاس ناکامی کی کوئی گنجائش باقی نہیں۔
یہ بھی پڑھیں : غیر قانونی بھرتیوں کا بڑا سکینڈل!نیب کا سابق وفاقی وزیراسعد محمود کو آخری وارننگ کیساتھ طلبی کا حکم
انہوں نے مزید کہا کہ ریاست اور سیکیورٹی ادارے خیبرپختونخوا میں دہشت گردی کے خلاف برسر پیکار ہیں لیکن پی ٹی آئی کا اس اہم قومی مسئلے میں تعاون ہمیشہ صفر رہا۔ صوبے میں گورنر راج اور ایمرجنسی کا نفاذ پی ٹی آئی کے اپنے اقدامات کا نتیجہ تھا جس نے ایک سیاسی خودکشی کا روپ دھارا، اور حکومت نے ناگزیر آخری چارے کے طور پر یہ قدم اٹھایا۔ پی ٹی آئی کی سیاست نے ہمیشہ انتشار کو ہوا دی، لیکن اب ملک امن اور پائیدار ترقی کی سمت گامزن ہو رہا ہے۔
