دالبندین:بلوچستان کے ضلع چاغی میں سیکیورٹی فورسز نے ایک انٹیلی جنس پر مبنی بروقت کارروائی (IBO) کرتے ہوئے دالبندین ایئرپورٹ، زائرین کے قافلوں اور مال بردار ٹرکوں کو نشانہ بنانے کا ایک بڑا دہشت گردانہ منصوبہ ناکام بنا دیا ہے۔
سوشل میڈیا اور غیر مصدقہ حلقوں میں گردش کرنے والی افواہوں کے برعکس، اندرونی آپریشنل دستاویزات اور سیکیورٹی ذرائع سے یہ بات واضح ہو چکی ہے کہ ایئرپورٹ پر براہِ راست کوئی حملہ نہیں ہوا، بلکہ سیکیورٹی اداروں نے پیشہ ورانہ مہارت کا مظاہرہ کرتے ہوئے حملہ آوروں کو ان کی منصوبہ بندی اور ریکی (جاسوسی) کے مرحلے میں ہی گھیر کر جہنم واصل کر دیا۔
سیکیورٹی ذرائع کے مطابق، قانون نافذ کرنے والے اداروں کو گزشتہ چند روز سے مصدقہ اطلاعات موصول ہو رہی تھیں کہ کالعدم عسکریت پسند نیٹ ورک “فتنہ الہندوستان” (FAH) سے وابستہ عناصر دالبندین میں حساس تنصیبات کو نشانہ بنانے کی گھناؤنی سازش تیار کر رہے ہیں۔
ان دہشت گردوں کے بنیادی اہداف میں دالبندین ایئرپورٹ، ایران آنے جانے والے زائرین کا ریسٹ ایریا اور علاقے میں موجود تجارتی ٹرکوں کا اڈہ (اسٹیجنگ ایریا) شامل تھے۔
ان اطلاعات کی مصدقہ تصدیق اور دہشت گردوں کے گرد گھیرا تنگ کرنے کے لیے 14 نومبر 2026 کی شب تقریباً ساڑھے گیارہ بجے فرنٹیئر کور (دالبندین رائفلز) کی ایک خصوصی ٹیم نے ڈھاڈر نالہ کے علاقے میں ٹارگٹڈ آپریشن کا آغاز کیا۔
آپریشن کے آغاز کے محض چند منٹ بعد، رات 11 بج کر 35 منٹ پر کوئٹہ-تفتان مرکزی شاہراہ (این-40) پر ڈھاڈر لنڈی کے قریب سیکیورٹی دستوں کا آمنا سامنا دو مشکوک مسلح افراد سے ہوا، جو ابتدائی تحقیقات کے مطابق ممکنہ حملے کے لیے علاقے کی ریکی کر رہے تھے۔
سیکیورٹی اہلکاروں کو دیکھتے ہی دہشت گردوں نے اندھا دھند فائرنگ شروع کر دی اور اندھیرے کا فائدہ اٹھاتے ہوئے قریبی برساتی نالے (ڈھاڈر نالہ) میں دو مختلف سمتوں میں فرار ہونے کی کوشش کی۔
سیکیورٹی فورسز نے فوری جوابی کارروائی کرتے ہوئے فرار ہونے والے ملزمان کا تعاقب کیا۔ اسی دوران انسدادِ دہشت گردی کی دو ریزرو ٹیمیں بھی فوری طور پر جائے وقوعہ پر پہنچ گئیں اور نالے کے تمام داخلی و خارجی راستوں کی فول پروف ناکہ بندی کر دی تاکہ ملزمان فرار ہونے میں کامیاب نہ ہو سکیں۔
یہ بھی پڑھیں : صوابی: امن و امان کے پیش نظر ضلع بھر میں ایک ماہ کے لیے دفعہ 144 نافذ، جلسے جلوسوں اور اجتماعات پر پابندی
دو طرفہ شدید فائرنگ کے تبادلے کے بعد سیکیورٹی فورسز نے دونوں دہشت گردوں کو ہلاک کر دیا۔ موقع پر کیے گئے سرچ آپریشن کے دوران ملزمان کے قبضے سے ایک موٹر سائیکل، دو سب مشین گنیں (SMGs)، سات عدد میگزین، 210 گولیاں، ایک کمبل اور موٹر سائیکل کی مرمت کا سامان برآمد ہوا، جو اس بات کا واضح ثبوت ہے کہ ملزمان طویل مسافت طے کر کے علاقے میں کسی بڑی تخریبی کارروائی کی تیاری کے ساتھ داخل ہوئے تھے۔
واقعے کے بعد بعض حلقوں کی جانب سے سوشل میڈیا پر دالبندین ایئرپورٹ پر براہِ راست حملے کی قیاس آرائیاں کی گئیں، تاہم آپریشنل شواہد نے ان تمام افواہوں کو یکسر مسترد کر دیا ہے۔
سیکیورٹی ماہرین کا کہنا ہے کہ این-40 شاہراہ اور ڈھاڈر نالہ کا محلِ وقوع تزویراتی طور پر انتہائی حساس ہے، کیونکہ یہی راستہ ایئرپورٹ اور زائرین کی گزرگاہوں کی طرف جاتا ہے۔
اگر بروقت انٹیلی جنس کی بنیاد پر ان عناصر کو ریکی کے دوران ہی نہ روکا جاتا، تو یہ شرپسند عناصر ایئرپورٹ یا پرامن شہری آبادی کے لیے سنگین خطرہ بن سکتے تھے۔
سیکیورٹی فورسز کی بروقت، جرأت مندانہ اور پیشہ ورانہ حکمتِ عملی نے حملے سے قبل ہی اس دہشت گرد نیٹ ورک کا قلع قمع کر کے پورے علاقے کو ایک بڑے نقصان سے بچا لیا ہے۔
