بلوچستان کے ضلع لسبیلہ کی تحصیل اوتھل میں زیرو پوائنٹ کے قریب ایک مسافر کوچ اور ٹرک کے درمیان افسوسناک تصادم کے نتیجے میں 6 افراد جاں بحق اور 17 مسافر زخمی ہو گئے، جن میں خواتین اور بچے بھی شامل ہیں۔
ایس ایس پی لسبیلہ کے مطابق حادثے کا شکار مسافر کوچ پنجگور سے کراچی جارہی تھی کہ راستے میں تیز رفتاری اور ممکنہ لاپروائی کے باعث زیرو پوائنٹ کے قریب سامنے سے آنے والے ٹرک سے جا ٹکرائی۔
حادثے کے فوراً بعد ریسکیو ٹیمیں، پولیس اور مقامی افراد موقع پر پہنچ گئے۔ جاں بحق افراد کی لاشوں اور زخمیوں کو قریبی اسپتال منتقل کر دیا گیا ہے، جہاں زخمیوں کو طبی امداد فراہم کی جا رہی ہے۔
پولیس کے مطابق حادثے کے بعد قومی شاہراہ (N-25) پر ٹریفک کی روانی متاثر ہوئی، تاہم امدادی کارروائیاں تیزی سے جاری ہیں اور سڑک کو کلیئر کرنے کی کوششیں کی جا رہی ہیں۔
ابتدائی اطلاعات کے مطابق حادثے کی وجوہات میں تیز رفتاری اور ڈرائیور کی غفلت شامل ہو سکتی ہے، تاہم مکمل تحقیقات جاری ہیں۔
انتظامیہ نے شہریوں سے محتاط ڈرائیونگ اور ٹریفک قوانین کی سختی سے پابندی کی اپیل کی ہے تاکہ ایسے المناک حادثات سے بچا جا سکے۔
