پشاور: پیرزکوڑی پل کے قریب تھانہ گلبہار کی پولیس موبائل وین کے قریب دھماکے کے نتیجے میں دو پولیس اہلکار زخمی ہوگئے، جبکہ گاڑی کو بھی نقصان پہنچا ہے۔
سی سی پی او پشاور ڈاکٹر میاں سعید کے مطابق دھماکہ خیز مواد روڈ کنارے گرین بیلٹ میں نصب کیا گیا تھا، جسے پولیس موبائل کو نشانہ بنانے کے لیے استعمال کیا گیا۔
پشاور میں پیر زکوڑی پل کے قریب تھانہ گلبہار کی پولیس موبائل وین پر دھماکہ۔۔۔۔۔ pic.twitter.com/Ef9pqeY5yJ
— Pakhtun Digital (@PakhtunDigital) August 2, 2026
انہوں نے بتایا کہ دھماکے کے بعد زخمی پولیس اہلکاروں کو فوری طور پر طبی امداد کے لیے اسپتال منتقل کر دیا گیا، جہاں انہیں علاج فراہم کیا جا رہا ہے۔
سی سی پی او کے مطابق پولیس موبائل معمول کے مطابق اس مقام پر کھڑی ہوتی ہے، واقعے کے تمام پہلوؤں کا جائزہ لیا جا رہا ہے جبکہ جائے وقوعہ سے شواہد اکٹھے کیے جا رہے ہیں۔
یہ بھی پڑھیں : پشاور میں زیر تعمیر عمارت کی دیوار گر گئی، 6 مزدور زخمی
پولیس کی بھاری نفری فوری طور پر موقع پر پہنچ گئی اور علاقے کو گھیرے میں لے کر تفتیش شروع کر دی گئی۔ ابتدائی معلومات کے مطابق واقعہ مبینہ طور پر آئی ای ڈی کے ذریعے پیش آیا، تاہم مزید تحقیقات کے بعد ہی مکمل تفصیلات سامنے آسکیں گی۔
سیکیورٹی ادارے واقعے میں ملوث عناصر کی تلاش اور شواہد کی بنیاد پر تحقیقات کا عمل جاری رکھے ہوئے ہیں۔
