اسلام آباد: تبلیغی جماعت کے امیر مولانا نذرالرحمان انتقال کر گئے، ان کے انتقال کی خبر سامنے آتے ہی ملک بھر کے مذہبی، دینی اور سماجی حلقوں میں گہرے دکھ اور افسوس کی لہر دوڑ گئی، جبکہ تبلیغی جماعت سے وابستہ افراد اور عقیدت مندوں میں سوگ کی فضا چھا گئی۔
مولانا نذرالرحمان کا شمار ملک کی اہم اور معتبر مذہبی شخصیات میں ہوتا تھا۔ انہیں 2018 میں تبلیغی جماعت کا امیر مقرر کیا گیا تھا، جس کے بعد انہوں نے جماعت کی قیادت اور تبلیغی سرگرمیوں کے فروغ میں اہم کردار ادا کیا۔
انہوں نے اپنی زندگی دینِ اسلام کی دعوت، تبلیغ اور اشاعت کے لیے وقف کر رکھی تھی اور طویل عرصے تک دینی خدمات انجام دیتے رہے۔مولانا نذرالرحمان کی قیادت میں تبلیغی جماعت نے اپنے دعوتی اور تبلیغی مشن کو جاری رکھا۔
دینی حلقوں میں انہیں ان کی مذہبی خدمات، سادگی، دینی وابستگی اور تبلیغی مشن سے گہری وابستگی کے باعث قدر و احترام کی نگاہ سے دیکھا جاتا تھا۔ان کے انتقال کی خبر نے ملک بھر میں ان کے عقیدت مندوں اور دینی حلقوں کو افسردہ کر دیا ہے۔
مختلف مذہبی حلقوں کی جانب سے ان کی وفات پر دکھ اور تعزیت کا اظہار کیا جا رہا ہے۔دوسری جانب وفاقی وزیر داخلہ محسن نقوی نے بھی تبلیغی جماعت کے امیر مولانا نذرالرحمان کے انتقال پر گہرے رنج و غم کا اظہار کیا ہے۔
اپنے تعزیتی پیغام میں محسن نقوی نے مرحوم کے اہل خانہ اور تبلیغی جماعت کے اکابرین سے دلی ہمدردی اور تعزیت کرتے ہوئے کہا کہ مولانا نذرالرحمان نے دینِ اسلام کی سربلندی اور تبلیغ کے لیے گراں قدر خدمات انجام دیں، جنہیں ہمیشہ سنہری حروف میں یاد رکھا جائے گا۔
یہ بھی پڑھیں : بین الاقوامی اداروں کو جھوٹے خطوط لکھوانے والا سازشی ٹولہ، پی ٹی ایم کا اصلی غدار روپ عوام کے سامنے آ گیا
وفاقی وزیر داخلہ نے کہا کہ مرحوم کی دینی اور تبلیغی خدمات قابلِ قدر ہیں۔ انہوں نے دعا کی کہ اللہ تعالیٰ مولانا نذرالرحمان کی مغفرت فرمائے، ان کے درجات بلند کرے اور انہیں جوارِ رحمت میں اعلیٰ مقام عطا فرمائے۔
محسن نقوی نے سوگوار خاندان، عزیز و اقارب اور تبلیغی جماعت کے وابستگان کے لیے صبرِ جمیل کی دعا بھی کی۔متعلقہ ذرائع کے مطابق مولانا نذرالرحمان کی نمازِ جنازہ کے وقت اور مقام کا حتمی اعلان بعد میں کیا جائے گا۔ نمازِ جنازہ سے متعلق تفصیلات سامنے آنے پر آگاہ کیا جائے گا۔
مولانا نذرالرحمان کے انتقال سے دینی حلقے ایک اہم مذہبی و تبلیغی شخصیت سے محروم ہو گئے ہیں، جبکہ ان کی دینی خدمات اور تبلیغی مشن کے لیے جدوجہد کو ان کے عقیدت مندوں کی جانب سے ہمیشہ یاد رکھا جائے گا۔





