اسلام آباد: ملک میں موٹرسائیکل اور تھری ویلرز کی فروخت میں رواں مالی سال کے پہلے پانچ ماہ کے دوران سالانہ بنیادوں پر نمایاں اضافہ ریکارڈ کیا گیا ہے۔
پاکستان آٹوموبائل مینوفیکچررز ایسوسی ایشن (PAMA) کے اعداد و شمار کے مطابق مالی سال کے ابتدائی پانچ ماہ میں موٹرسائیکل کے 747,738 یونٹس فروخت ہوئے، جو پچھلے مالی سال کی اسی مدت میں 563,207 یونٹس کے مقابلے میں تقریباً 33 فیصد زیادہ ہیں۔
نومبر کے مہینے میں موٹرسائیکل کی فروخت 163,007 یونٹس رہی جو اکتوبر کے 161,607 یونٹس کے مقابلے میں معمولی اضافہ اور گزشتہ سال نومبر کے 117,340 یونٹس کے مقابلے میں 39 فیصد زیادہ ہے۔
اس سے ظاہر ہوتا ہے کہ ملک میں موٹرسائیکل کی طلب مسلسل بڑھ رہی ہے۔تھری ویلرز کی فروخت میں بھی سالانہ بنیادوں پر ہلکی بہتری دیکھنے میں آئی ہے۔
مالی سال کے پہلے پانچ ماہ میں 15,040 یونٹس تھری ویلرز فروخت ہوئے، جو گزشتہ مالی سال کی اسی مدت کے 14,957 یونٹس کے مقابلے میں ایک فیصد زیادہ ہے۔
تاہم نومبر میں تھری ویلرز کی فروخت 2,746 یونٹس ریکارڈ کی گئی جو اکتوبر کے 3,876 یونٹس اور پچھلے سال نومبر کے 3,144 یونٹس کے مقابلے میں بالترتیب 29 فیصد اور 13 فیصد کم رہی۔
یہ بھی پڑھیں : غزہ: بمباری، بارش اور شدید سردی نے بچوں کی جانیں داؤ پر لگا دی
ماہرین کے مطابق موٹرسائیکل مارکیٹ میں بڑھتی ہوئی فروخت سے ظاہر ہوتا ہے کہ شہری اور دیہی علاقوں میں آمدنی اور نقل و حمل کی ضرورت کے پیش نظر موٹرسائیکل کی مانگ میں اضافہ ہوا ہے، جبکہ تھری ویلرز کی فروخت میں کمی ممکنہ طور پر اقتصادی حالات اور متبادل نقل و حمل کے ذرائع کی وجہ سے ہے۔
یہ اعدادوشمار ملکی آٹوموبائل مارکیٹ کے رجحانات اور مستقبل کی پیداوار و فروخت کی حکمت عملی کے لیے اہم معلومات فراہم کرتے ہیں۔
