حکومت خیبر پختونخوا نے صوبائی بیوروکریسی میں اہم تبدیلیاں کرتے ہوئے گریڈ 19 کے افسران کے تبادلوں اور تعیناتیوں کا اعلامیہ جاری کر دیا ہے۔
محکمہ اسٹیبلشمنٹ کی جانب سے جاری کردہ نوٹیفکیشن کے مطابق، پی ایم ایس افسر شمع نعمت (بی ایس-19) کو ان کے موجودہ عہدے سے تبدیل کر دیا گیا ہے۔
شمع نعمت اس سے قبل محکمہ داخلہ و قبائلی امور کے تحت قائم خیبر پختونخوا چیئرٹیز کمیشن میں بطور ڈائریکٹر خدمات سرانجام دے رہی تھی تاہم انہیں ڈائریکٹر ایکسائز، ٹیکسیشن اینڈ نارکوٹکس کنٹرول خیبر پختونخوا کے اہم عہدے پر تعینات کر دیا گیا ہے۔
محکمہ اسٹیبلشمنٹ کے اعلامیے میں مزید بتایا گیا ہے کہ ان تبدیلیوں کے سلسلے میں محمد طارق (پی ایم ایس، بی ایس-19) کا تبادلہ بھی عمل میں لایا گیا ہے۔ محمد طارق جو اس سے قبل ڈائریکٹر ایکسائز، ٹیکسیشن اینڈ نارکوٹکس کنٹرول کے طور پر فرائض ادا کر رہے تھے انہیں اب ڈائریکٹر لوکل گورنمنٹ (ضم شدہ اضلاع) خیبر پختونخوا تعینات کر دیا گیا ہے۔
