اسلام آباد: وفاقی وزیر منصوبہ بندی احسن اقبال نے کہا ہے کہ پاکستان نے خطے میں امن کے قیام کے لیے مؤثر اور ذمہ دارانہ کردار ادا کیا ہے، جسے عالمی سطح پر سراہا جا رہا ہے۔
نارووال میں اپنے آبائی حلقے میں ایک تقریب سے خطاب کرتے ہوئے انہوں نے خطے کی موجودہ صورتحال پر روشنی ڈالی اور کہا کہ حالیہ کشیدگی کے اثرات صرف مقامی سطح تک محدود نہیں رہے بلکہ اس کے باعث عالمی معیشت بھی متاثر ہوئی۔
ان کے مطابق بڑھتی ہوئی کشیدگی نے توانائی کے عالمی بحران کو مزید سنگین بنا دیا، جس کے نتیجے میں پٹرولیم مصنوعات کی قیمتوں میں نمایاں اضافہ دیکھنے میں آیا۔
احسن اقبال نے اس موقع پر پاکستان کے مثبت کردار کو اجاگر کرتے ہوئے کہا کہ ملک نے ہمیشہ خطے میں استحکام اور امن کو فروغ دینے کی کوشش کی ہے۔
انہوں نے دعویٰ کیا کہ عالمی رہنما بھی پاکستان کی ان کوششوں کو تسلیم کر رہے ہیں۔ ان کے مطابق امریکی صدر ڈونلڈ ٹرمپ نے بھی پاکستان کی قیادت کی تعریف کی اور امن کے لیے کیے گئے اقدامات کو سراہا۔
وفاقی وزیر کا کہنا تھا کہ عالمی برادری پاکستان کی سفارتی اور دفاعی حکمت عملی کو قدر کی نگاہ سے دیکھ رہی ہے، اور ملک کی کاوشوں کو خطے میں امن کے قیام کے لیے اہم قرار دیا جا رہا ہے۔
یہ بھی پڑھیں : ہم نے آپ کو مزاحمت کے لیے لائے تھے، لیکن آپ سب سے بڑے ڈرامے باز نکلے، پی ٹی آئی کارکن سہیل آفریدی پر برس پڑے
اپنے خطاب میں انہوں نے حالیہ کشیدگی کے دوران پاکستان کی عسکری صلاحیتوں کا بھی ذکر کیا اور کہا کہ “معرکۂ حق” میں پاکستان کو نمایاں کامیابی حاصل ہوئی۔
ان کے مطابق ملکی مسلح افواج نے کسی بھی جارحیت کا بھرپور اور مؤثر جواب دے کر اپنی پیشہ ورانہ مہارت کا ثبوت دیا۔
انہوں نے مزید کہا کہ پاکستان نہ صرف اپنی سرحدوں کے دفاع کی مکمل صلاحیت رکھتا ہے بلکہ خطے میں پائیدار امن کے قیام کے لیے بھی سنجیدہ اور فعال کردار ادا کرتا رہے گا۔
