پاکستان کرکٹ ٹیم کو آسٹریلیا کے خلاف آئندہ ون ڈے سیریز سے قبل بڑا دھچکا لگ گیا،صائم ایوب اور فخر زمان انجری کے باعث سیریز سے باہر ہوگئے۔
پاکستان کرکٹ بورڈ (پی سی بی) نے باقاعدہ تصدیق کی ہے کہ دونوں کھلاڑی تاحال اپنی انجری سے مکمل طور پر صحت یاب نہیں ہو سکے ہیں اور وہ میڈیکل پینل کی زیر نگرانی اپنا ری ہیب پروگرام جاری رکھیں گے جس کے باعث انہیں آسٹریلیا کے خلاف تین میچوں پر مشتمل ون ڈے سیریز کے لیے اسکواڈ میں شامل نہیں کیا جائے گا۔
پی سی بی کے جاری کردہ شیڈول کے مطابق اس سیریز کا باقاعدہ آغاز 30 مئی کو راولپنڈی کرکٹ اسٹیڈیم میں پہلے ون ڈے سے ہوگا جبکہ سیریز کے بقیہ دو میچز بالترتیب 2 اور 4 جون کو لاہور کے قذافی اسٹیڈیم میں کھیلے جائیں گے۔
صائم ایوب کی عدم دستیابی کو قومی ٹیم کے لیے بڑا نقصان قرار دیا جا رہا ہے کیونکہ انہوں نے اپنے ڈیبیو کے بعد سے ون ڈے فارمیٹ میں انتہائی متاثر کن کارکردگی کا مظاہرہ کیا ہے جبکہ فخر زمان بھی طویل عرصے سے پاکستان کی بیٹنگ لائن اپ کا اہم ستون رہے ہیں۔
پی سی بی نے دونوں کھلاڑیوں کی جلد صحت یابی کے لیے نیک خواہشات کا اظہار کرتے ہوئے واضح کیا ہے کہ قومی اسکواڈ کے دیگر کھلاڑیوں کی فٹنس اور ٹیم کے حوالے سے مزید تفصیلات جلد شیئر کی جائیں گی۔
