اخونزادہ فضل حق
مردان کے پوش علاقے شیخ ملتون ٹاؤن میں نامعلوم ملزمان نے رات کی تاریکی میں ایک گھر کے اندر گھس کر اندھا دھند فائرنگ کر دی، جس کے نتیجے میں خاتون سمیت 3 افراد قتل ہو گئے۔
پولیس ذرائع کے مطابق افسوسناک واقعے میں ہلاک ہونے والوں میں میاں بیوی اور سالہ شامل ہیں، جن کی شناخت جلال، زوجہ جلال اور مصطفی کے ناموں سے ہوئی ہے۔
نامعلوم ملزمان رات کے اندھیرے کا فائدہ اٹھاتے ہوئے موقع سے فرار ہونے میں کامیاب ہو گئے۔
واقعے کا انکشاف اس وقت ہوا جب مقتول جلال کے سسر نے صبح بار بار گھر کے دروازے پر دستک دی مگر اندر سے کوئی جواب نہیں آیا اور دروازہ بند رہا۔ شک ہونے پر جب اندر جا کر دیکھا گیا تو تینوں افراد خون میں لت پت مردہ حالت میں پڑے تھے۔
واقعے کی اطلاع ملتے ہی ڈی پی او مردان سمیت پولیس کی بھاری نفری جائے وقوعہ پر پہنچ گئی اور شواہد اکٹھے کیے۔
پولیس کے مطابق تینوں لاشوں کو پوسٹ مارٹم اور ضابطے کی کارروائی کے لیے مردان میڈیکل کمپلیکس منتقل کر دیا گیا ہے جبکہ ملزمان کی گرفتاری کے لیے تحقیقات کا آغاز کر دیا گیا ہے۔
