گرمی کی شدت میں اضافے کے ساتھ جلد کے مسائل بھی بڑھ جاتے ہیں، جن میں دھوپ سے جھلسنا، خشکی، پسینے کی وجہ سے جِلدی انفیکشن اور الرجی شامل ہیں۔
ماہرین صحت کے مطابق چند احتیاطی تدابیر اپنا کر جلد کو بہتر طور پر محفوظ رکھا جا سکتا ہے۔
ماہرین کا کہنا ہے کہ تیز دھوپ میں باہر نکلتے وقت سن اسکرین کا استعمال انتہائی ضروری ہے، خاص طور پر ایسی کریم جس کا ایس پی ایف لیول 30 یا اس سے زیادہ ہو، اسے کم از کم 15 سے 20 منٹ پہلے لگانا چاہیے تاکہ یہ جلد میں بہتر طریقے سے جذب ہو سکے۔
گرمی میں ہلکے اور ڈھیلے کپڑوں کا استعمال بھی جلد کی حفاظت میں مددگار ثابت ہوتا ہے۔ کاٹن کے کپڑے پسینہ جذب کرتے ہیں اور جلد کو سانس لینے کا موقع دیتے ہیں، جس سے ریشز اور جلن کے امکانات کم ہو جاتے ہیں۔
ماہرین کے مطابق پانی کا زیادہ استعمال بھی جلد کی صحت کے لیے نہایت ضروری ہے، کیونکہ جسم میں پانی کی کمی جلد کو خشک اور بے رونق بنا سکتی ہے، روزانہ کم از کم 8 سے 10 گلاس پانی پینے کی سفارش کی جاتی ہے۔
یہ بھی پڑھیں: قیامت خیز گرمی: شہید بینظیر آباد میں 15 سالہ ریکارڈ برابر، پارہ 51 ڈگری تک جا پہنچا
اس کے علاوہ چہرے کو بار بار دھونا اور پسینے کو صاف رکھنا بھی ضروری ہے تاکہ بیکٹیریا اور جراثیم جمع نہ ہوں، سخت کیمیکل والے صابن اور کریموں سے پرہیز کرنے کا مشورہ دیا جاتا ہے۔
ماہرین یہ بھی کہتے ہیں کہ دھوپ کے اوقات یعنی صبح 11 بجے سے دوپہر 4 بجے تک غیر ضروری طور پر باہر نکلنے سے گریز کیا جائے، کیونکہ اس دوران سورج کی شعاعیں سب سے زیادہ نقصان دہ ہوتی ہیں۔
جلد کے کسی بھی مسئلے کی صورت میں فوری طور پر ماہرِ جلد سے رجوع کرنا بہتر سمجھا جاتا ہے تاکہ بروقت علاج ممکن ہو سکے۔
