اسلام آباد: فیڈرل پبلک سروس کمیشن (ایف پی ایس سی) نے سی ایس ایس 2027 کے لیے ایم سی کیوز بیسڈ پریلمینری ٹیسٹ (ایم پی ٹی) کا شیڈول جاری کر دیا ہے، جس میں آن لائن درخواستوں کے اجرا اور امتحان کی تاریخ کا باقاعدہ اعلان کیا گیا ہے۔
ایف پی ایس سی کے جاری کردہ پبلک نوٹس کے مطابق سی ایس ایس 2027 کے ایم پی ٹی میں شرکت کے خواہشمند امیدوار 20 اگست 2026 تک اپنی آن لائن درخواستیں جمع کرا سکیں گے۔
کمیشن نے واضح کیا ہے کہ مقررہ تاریخ کے بعد موصول ہونے والی درخواستوں پر غور نہیں کیا جائے گا، اس لیے امیدوار بروقت رجسٹریشن کا عمل مکمل کریں۔
نوٹس کے مطابق ایم سی کیوز بیسڈ پریلمینری ٹیسٹ 27 ستمبر 2026 بروز اتوار ملک بھر کے 19 مختلف شہروں میں بیک وقت منعقد کیا جائے گا۔
امیدوار آن لائن درخواست جمع کراتے وقت اپنی سہولت کے مطابق امتحانی مرکز کا انتخاب کر سکیں گے، تاہم حتمی امتحانی مراکز کا تعین امیدواروں کی تعداد اور انتظامی ضروریات کو مدنظر رکھتے ہوئے کیا جائے گا۔
ایف پی ایس سی نے بتایا کہ ایم پی ٹی میں کامیابی حاصل کرنے والے امیدوار ہی سی ایس ایس 2027 کے تحریری امتحان میں شرکت کے اہل ہوں گے۔ کمیشن کے مطابق پریلمینری ٹیسٹ سی ایس ایس امتحانی عمل کا لازمی مرحلہ ہے، جسے کامیابی سے عبور کرنا ضروری ہوگا۔
یہ بھی پڑھیں : لکی مروت میں سیکیورٹی فورسز کا بڑا آپریشن، خوارج کے ٹھکانے تباہ، متعدد ہلاک
کمیشن نے امیدواروں کو ہدایت کی ہے کہ درخواست جمع کرانے سے قبل اہلیت، عمر کی حد، تعلیمی قابلیت، امتحانی قواعد اور دیگر شرائط کا تفصیلی جائزہ لے لیں۔
امیدواروں کو یہ بھی کہا گیا ہے کہ آن لائن درخواست مکمل کرنے کے بعد فراہم کردہ معلومات کی تصدیق کریں اور مقررہ فیس بروقت جمع کرائیں تاکہ درخواست مکمل تصور کی جا سکے۔
واضح رہے کہ سی ایس ایس پاکستان کا ایک اہم اور انتہائی مسابقتی امتحان ہے، جس کے ذریعے وفاقی حکومت کی مختلف اعلیٰ سروسز کے لیے افسران کا انتخاب کیا جاتا ہے۔
ہر سال ہزاروں امیدوار اس امتحان میں حصہ لیتے ہیں، جبکہ ایم پی ٹی کے نظام کے ذریعے ابتدائی مرحلے میں امیدواروں کی جانچ کا عمل مزید مؤثر بنایا گیا ہے۔
ایف پی ایس سی نے امیدواروں کو مشورہ دیا ہے کہ وہ رجسٹریشن کے ساتھ اپنی امتحانی تیاری بھی تیز کر دیں تاکہ وہ بہتر کارکردگی کا مظاہرہ کر سکیں۔
