ڈارون: بنگلہ دیش نے تاریخ رقم کرتے ہوئے آسٹریلیا کو اسی کی سرزمین پر پہلے ٹیسٹ میچ میں 9 وکٹوں سے شکست دے دی، یہ آسٹریلوی سرزمین پر بنگلہ دیش کی پہلی ٹیسٹ فتح ہے۔
آسٹریلیا نے پہلی اننگز میں 198 رنز بنائے، جس میں اسٹیو اسمتھ 71 رنز کے ساتھ نمایاں رہے، بنگلہ دیش کی جانب سے حسن محمود نے شاندار باؤلنگ کا مظاہرہ کرتے ہوئے 6 کھلاڑیوں کو پویلین کی راہ دکھائی۔
جواب میں بنگلہ دیش نے اپنی پہلی اننگز میں 426 رنز بنائے، تنزید حسن نے 101 رنز کی سنچری اننگز کھیلی جبکہ نجم الحسین شانتو نے 84 اور مہدی حسن میراز نے 65 رنز بنائے، آسٹریلیا کی جانب سے جوش ہیزل ووڈ نے 6 وکٹیں حاصل کیں۔
آسٹریلیا نے دوسری اننگز میں 284 رنز بنائے۔ کیمرون گرین نے شاندار 104 رنز کی اننگز کھیلی تاہم وہ اپنی ٹیم کو شکست سے نہ بچا سکے۔
بنگلہ دیش کی جانب سے مہدی حسن میراز نے 5 وکٹیں حاصل کیں جبکہ حسن محمود نے میچ میں مجموعی طور پر 9 وکٹیں حاصل کرکے فتح میں اہم کردار ادا کیا۔
یہ بھی پڑھیں: جشنِ آزادی پر کرکٹ شائقین کیلئے بڑا سرپرائز، محسن نقوی نے اعلان کردیا
آسٹریلیا کی جانب سے دیے گئے 57 رنز کے ہدف کے تعاقب میں بنگلہ دیش نے صرف ایک وکٹ کے نقصان پر ہدف حاصل کرلیا، مومن الحق نے 30 جبکہ شادمان اسلام نے 25 رنز بنائے۔
اس تاریخی کامیابی کے ساتھ بنگلہ دیش نے دو ٹیسٹ میچوں کی سیریز میں 1-0 کی برتری حاصل کرلی ہے۔
