سہیل آفریدی کے قافلے میں شامل گاڑی نے موٹر سائیکل سوار کو روند ڈالا، ڈرائیور نے گاڑی روکنا بھی مناسب نہ سمجھا

 پاکستان تحریک انصاف کے احتجاجی دھرنوں اور ریلیوں کے دوران کارکنوں کے ٹریفک حادثات میں جاں بحق ہونے کا المیہ نیا نہیں اور نہ ہی شائد یہ آخری ہو سکتا ہے، جہاں ماضی کی طرح اس بار بھی پارٹی قیادت کی جانب سے متاثرہ خاندانوں کی خبرگیری نہ کرنے پر شدید تنقید کی جا رہی ہے، وہاں ایک بار پھر دیگر جماعتوں کے ساتھ ساتھ پی ٹی آئی رہنما بھی مگرمچھ کے آنسو بہاکر افسوس کا اظہار کرتے رہیں گے اور یوں یہ سلسلہ جاری و

ساری رہے گا ۔

سیاسی و سماجی حلقوں میں یہ سوال شدت سے اٹھایا جا رہا ہے کہ ایسی کون سی سیاست ہے جس میں دھرنوں اور اجتماعات کے جوش میں اپنے ہی کارکن سڑکوں پر بے موت مارے جاتے ہیں، لیکن قیادت کے کان پر جوں تک نہیں رینگتی۔
ماضی میں بھی دھرنوں کے دوران کنٹینرز یا قافلے کی گاڑیوں تلے کارکنوں کے روندے جانے کی کئی دردناک مثالیں موجود ہیں، جن کے بعد نہ تو کوئی باقاعدہ قانونی چارہ جوئی سامنے آئی اور نہ ہی متاثرہ گھرانوں کی داد رسی کی گئی۔
تجزیہ کاروں کے مطابق کارکن کسی بھی سیاسی جماعت کا اصل سرمایہ ہوتے ہیں، لیکن بدقسمتی سےتحریک انصاف کی سیاست اس سے کوسوں دور دکھائی دیتی ہے ۔ احتجاج کی سیاست میں جب انسانی جانوں کو محض طاقت کے مظاہرے کے طور پر استعمال کیا جائے اور حادثات کے بعد لاشوں پر سیاست یا خاموشی اختیار کر لی جائے، تو یہ جمہوری اقدار اور انسانی ہمدردی کے صریحاً منافی ہے۔