ملک بھر کے شہریوں کو تیار شدہ پاسپورٹس کی بروقت فراہمی کو یقینی بنانے کے لیے ڈائریکٹوریٹ جنرل آف امیگریشن اینڈ پاسپورٹس نے ہفتے کے روز بھی ڈیلیوری کاؤنٹرز کھلے رکھنے کا فیصلہ کیا ہے۔
ترجمان کے مطابق یہ خصوصی سہولت اگلے 2 ماہ تک جاری رہے گی، جس کے دوران تمام پاسپورٹ ڈیلیوری کاؤنٹرز ہفتے کے روز صبح 8 بجے سے شام 4 بجے تک فعال رہیں گے۔
ڈی جی امیگریشن اینڈ پاسپورٹس نے شہریوں کو ہدایت کی ہے کہ وہ اپنے تیار پاسپورٹس جلد از جلد وصول کریں، خاص طور پر وہ افراد جو اپنے مصروف روزمرہ یا دفتری اوقات کی وجہ سے عام دنوں میں پاسپورٹ حاصل کرنے نہیں آ سکتے، وہ اس ہفتہ وار سہولت سے بھرپور فائدہ اٹھائیں۔
یہ بھی پڑھیں: پاسپورٹ گھر بیٹھے حاصل کریں، حکومت کا اہم اعلان
حکام کی جانب سے یہ بھی تنبیہ کی گئی ہے کہ جو پاسپورٹس 6 ماہ یا اس سے زائد عرصے تک وصول نہیں کیے جائیں گے، انہیں مروجہ حکومتی پالیسی کے تحت تلف کر دیا جائے گا۔
