ترکیہ کی قومی اسمبلی نے پاکستان اور سعودی عرب کے درمیان طے پانے والے تاریخی مکہ مشترکہ دفاعی معاہدے کی کثرتِ رائے سے منظوری دے دی ہے جس سے تینوں اہم اسلامی ممالک کے درمیان عسکری اور دفاعی تعاون کا نیا باب روشن ہو گیا ہے۔
ترک میڈیا کے مطابق 600 ارکان پر مشتمل پارلیمنٹ کے اجلاس کے دوران کل 398 ارکان نے ووٹنگ کے عمل میں حصہ لیا۔
مسودہ قانون پر رائے شماری کے نتیجے میں 279 ارکان نے معاہدے کے حق میں ووٹ دیا جبکہ 119 ارکان نے اس کی مخالفت کی۔
پارلیمنٹ کی منظوری کے بعد اب یہ سہ فریقی معاہدہ قانونی و آئینی طور پر نافذ العمل ہونے کی سمت بڑھ گیا ہے۔
ترک پارلیمنٹ کی خارجہ امور کمیٹی کے چیئرمین نے ایوان کو بریفنگ دیتے ہوئے معاہدے کی نوعیت پر اہم وضاحت جاری کی۔
انہوں نے واضح کیا کہ پاکستان، ترکیہ اور سعودی عرب کا یہ باہمی اتحاد مکمل طور پر دفاعی بنیادوں پر قائم کیا گیا ہے اور اس کا مقصد کسی تیسرے ملک کے خلاف جارحیت یا حملہ کرنا ہرگز نہیں، بلکہ خطے میں امن، استحکام اور مشترکہ دفاع کو یقینی بنانا ہے۔
انہوں نے ایوان کو یاد دہانی کرائی کہ اس تاریخی معاہدے پر رواں سال 7 اگست کو مقدس شہر مکہ مکرمہ میں تینوں ممالک کے اعلیٰ حکام اور سفیروں نے باقاعدہ دستخط کیے تھے جس کی اب ترک آئین کے تحت پارلیمانی توثیق بھی مکمل ہو چکی ہے۔
ترک پارلیمنٹ کی جانب سے اس معاہدے کی منظوری کی خبر سامنے آتے ہی پاکستان، ترکیہ اور سعودی عرب کے عوامی و دفاعی حلقوں میں خوشی کی لہر دوڑ گئی ہے۔
ماہرینِ دفاعی امور نے اسے مسلم دنیا کا ایک مضبوط اور پائیدار دفاعی بلاک قرار دیا ہے جو خطے میں جدید چیلنجز کا مقابلہ کرنے کے لیے انتہائی ضروری تھا۔
یہ بھی پڑھیں : بچوں کو وٹامن کے کے ٹیکے نہ لگوانے کے خوفناک نقصانات ،عالمی رپورٹ جاری!
عام شہریوں کی جانب سے سوشل میڈیا پر اس قدم کو سراہتے ہوئے امید ظاہر کی جا رہی ہے کہ یہ سہ فریقی معاہدہ نہ صرف عسکری ٹیکنالوجی اور تربیت کے تبادلے میں مددگار ثابت ہوگا بلکہ تینوں ممالک کے درمیان برادرمانہ تعلقات کو ایک نئی بلندی پر لے جائے گا۔
