ملکی سیاست میں جاری ری سیٹ کی بازگشت کے درمیان نوابشاہ میں صدر مملکت آصف علی زرداری اور وفاقی وزیر داخلہ محسن نقوی کے مابین ایک انتہائی اہم ملاقات ہوئی ہے جس میں ملک کی مجموعی سیاسی صورتحال، آئینی و انتظامی امور اور امن و امان سے متعلق اہم معاملات پر تفصیلی مشاورت کی گئی۔
ملاقات کے حوالے سے سامنے آنے والی تفصیلات اور ذرائع کے مطابق دونوں رہنماؤں کے درمیان ملک میں نئے انتظامی یونٹس کے قیام اور ممکنہ 28 ویں آئینی ترمیم کے معاملے پر تفصیلی تبادلہ خیال کیا گیا۔
سیاسی مبصرین ملک میں ری سیٹ سے متعلق حالیہ بیانات کے تناظر میں اس ملاقات کو غیر معمولی اہمیت دے رہے ہیں۔
ذرائع کا کہنا ہے کہ ملاقات میں بانی پاکستان تحریک انصاف (پی ٹی آئی) کی وکلا سے ہونے والی ملاقات، ان کی بہنوں کی رہائی اور اس کے ملکی سیاست پر مرتب ہونے والے ممکنہ اثرات کا بھی جائزہ لیا گیا۔
اس موقع پر صدر مملکت آصف علی زرداری نے ملکی استحکام اور سیاسی مسائل کے پائیدار حل کے لیے اپوزیشن جماعتوں کے ساتھ مذاکرات کی ضرورت پر زور دیا۔
اس کے علاوہ ملاقات کے دوران خیبرپختونخوا کی موجودہ سیاسی صورتحال اور صوبے میں امن و امان کے قیام کے حوالے سے بھی تفصیلی گفتگو کی گئی۔
وفاقی وزیر داخلہ محسن نقوی نے صدر مملکت کو ملک بھر بالخصوص حساس علاقوں میں قیامِ امن کے لیے کیے جانے والے اقدامات اور سیکیورٹی صورتحال سے متعلق تفصیلی بریفنگ دی۔
نوابشاہ میں ہونے والی اس اعلیٰ سطحی ملاقات پر عوامی و سیاسی حلقوں کی جانب سے ملا جلا ردعمل سامنے آ رہا ہے۔
بعض شہریوں اور تجزیہ کاروں کا کہنا ہے کہ صدر آصف علی زرداری کی جانب سے اپوزیشن جماعتوں کے ساتھ مذاکرات پر زور دینا ایک مثبت پیش رفت ہے کیونکہ سیاسی درجہ حرارت میں کمی اور مکالمے کے ذریعے ہی معاشی و انتظامی استحکام لایا جا سکتا ہے۔
شہریوں نے اس امید کا بھی اظہار کیا ہے کہ وفاقی وزیر داخلہ کے اقدامات اور صوبائی حکومتوں کے باہمی تعاون سے خیبرپختونخوا سمیت ملک بھر میں امن و امان کی صورتحال مزید بہتر ہوگی۔
یہ بھی پڑھیں : فجیرہ ٹریفک سانحہ:23 گاڑیوں کے خوفناک تصادم نے 14 گھر اجاڑ دیے، 30 افراد لہولہان
دوسری جانب سیاسی حلقوں کا ایک طبقہ نئے انتظامی یونٹس کے قیام اور ممکنہ 28 ویں آئینی ترمیم کے حوالے سے محتاط رویہ اپنائے ہوئے ہے۔
ان کا ماننا ہے کہ کسی بھی بڑی آئینی یا انتظامی تبدیلی سے قبل تمام سیاسی جماعتوں اور اسٹیک ہولڈرز کو اعتماد میں لینا ضروری ہے تاکہ قومی اتفاقِ رائے برقرار رہ سکے اور عوامی مسائل کے حل پر توجہ مرکوز رکھی جا سکے۔
