حکومت نے پاکستانی پاسپورٹ کے ڈیزائن میں بڑی تبدیلی کرنے کا فیصلہ کیا ہے جس کے تحت نئے پاسپورٹس میں نہ صرف سیکیورٹی فیچرز کو اپ گریڈ کیا جائے گا بلکہ اندرونی صفحات پر تاریخی اور ثقافتی ورثے کی تصاویر بھی شامل کی جائیں گی۔
ذرائع کے مطابق وزارتِ داخلہ نے پاسپورٹ کے نئے ڈیزائن کی منظوری دے دی ہے اور جلد ہی اس کی پرنٹنگ کا عمل شروع کیا جائے گا۔
نئے پاسپورٹ میں بیرونی صفحات کا رنگ موجودہ ڈیزائن کے مطابق رکھا جائے گا جبکہ اندرونی صفحات کا رنگ اور مواد تبدیل کیا جائے گا تاکہ جدید سیکیورٹی معیارات پر پورا اترا جا سکے۔
محکمہ امیگریشن اینڈ پاسپورٹس نے اس حوالے سے وضاحت کرتے ہوئے کہا ہے کہ نئے پاسپورٹس میں والدہ کے نام کو بھی والد کے نام کے ساتھ شامل کیا جائے گا، جو ایک اہم تبدیلی تصور کی جا رہی ہے۔
اس کے علاوہ ویزہ صفحات میں ملک کی تاریخی عمارات کی تصاویر شامل کی جائیں گی جو پاکستان کی ثقافت اور تاریخ کی عکاسی کریں گی۔
محکمہ نے بتایا کہ نئی پاسپورٹ بکلیٹس کی چھپائی پاکستان سیکیورٹی پرنٹنگ کارپوریشن کو دی گئی ہے جو کہ ملک میں سیکیورٹی ڈاکومنٹس کی تیاری کا ذمہ دار ادارہ ہے۔
مزید یہ کہ پاسپورٹ کی جدید کاری کا عمل جدید ٹیکنالوجی اور حفاظتی خصوصیات کو مدنظر رکھتے ہوئے کیا جا رہا ہے تاکہ غیر قانونی نقل و حرکت کو روکنے میں مدد ملے۔
یہ بھی پڑھیں : وزیراعظم شہباز شریف سے خیبرپختونخوا کے ارکان پارلیمنٹ اور سیاسی قیادت کی اہم ملاقات
محکمہ نے یہ بھی واضح کیا کہ پاسپورٹ کے بنیادی فیچرز میں کوئی تبدیلی نہیں کی جائے گی اور تمام تبدیلیاں صرف جدیدیت اور سیکیورٹی کی بہتری کے لیے ہوں گی۔
یہ اقدامات پاکستانی شہریوں کے سفری دستاویزات کو مزید محفوظ اور جدید بنانے کے لیے کیے جا رہے ہیں تاکہ عالمی معیار کے مطابق پاسپورٹ سروسز فراہم کی جا سکیں۔
اس تبدیلی سے نہ صرف شہریوں کو سہولت حاصل ہوگی بلکہ ملک کی بین الاقوامی ساکھ میں بھی اضافہ ہوگا۔
وزارت داخلہ اور محکمہ امیگریشن اینڈ پاسپورٹس نے کہا ہے کہ عوام کو نئی تبدیلیوں سے متعلق مزید تفصیلات جلد فراہم کی جائیں گی۔
