عالمی منڈی میں جمعرات کے روز سونے کی قیمتوں میں ایک فیصد سے زائد اضافہ ریکارڈ کیا گیا، جس کے باعث گزشتہ سیشن میں ہونے والی کمی کا جزوی ازالہ ہو گیا۔ امریکی فیڈرل ریزرو کی سخت مالیاتی پالیسی کے اشاروں کے باوجود سونے کی طلب میں بہتری دیکھنے میں آئی ہے۔
اسپاٹ گولڈ 1.3 فیصد اضافے کے ساتھ 4,311.83 ڈالر فی اونس تک پہنچ گیا (0441 GMT تک)، جبکہ بدھ کے روز اس کی قیمت میں 1.7 فیصد کمی ریکارڈ کی گئی تھی۔ دوسری جانب امریکی گولڈ فیوچرز (اگست ڈیلیوری) 1.1 فیصد کمی کے ساتھ 4,332.50 ڈالر فی اونس پر آ گئے۔
مارکیٹ ماہر کیلون وونگ (OANDA) کے مطابق سونے کی قیمت میں حالیہ اضافہ بنیادی طور پر شارٹ پوزیشنز کے بند ہونے اور مشرق وسطیٰ میں کشیدگی میں کمی کے باعث ہوا ہے، جس سے تیل کی قیمتوں میں بھی کمی دیکھی گئی
رپورٹس کے مطابق امریکا اور ایران کے درمیان عارضی معاہدے کے بعد تیل کی قیمتوں میں کمی آئی ہے، جس کے نتیجے میں افراطِ زر کے خدشات میں بھی کمی واقع ہوئی ہے۔ معاہدے کے تحت جنگ بندی میں مزید 60 روز کی توسیع کی گئی ہے تاکہ حتمی معاہدے تک بات چیت جاری رکھی جا سکے۔
ماہرین کا کہنا ہے کہ بلند تیل کی قیمتیں عام طور پر مہنگائی اور شرحِ سود میں اضافے کے امکانات کو بڑھاتی ہیں، جس کے باعث سونے پر دباؤ بڑھتا ہے کیونکہ سونا کوئی منافع (yield) فراہم نہیں کرتا۔ تاہم موجودہ صورتحال میں فیڈرل ریزرو کی ممکنہ پالیسی تبدیلیوں کے باعث سرمایہ کار محتاط رویہ اختیار کیے ہوئے ہیں۔
فیڈ کے 19 میں سے 9 پالیسی سازوں نے آئندہ شرحِ سود میں اضافے کے امکان کی نشاندہی کی ہے، جبکہ CME FedWatch Tool کے مطابق دسمبر میں شرحِ سود میں اضافے کے امکانات 85 فیصد تک پہنچ چکے ہیں۔
دوسری جانب دیگر قیمتی دھاتوں کی قیمتوں میں بھی اضافہ دیکھا گیا ہے۔ چاندی 1.5 فیصد بڑھ کر 69.03 ڈالر فی اونس، پلاٹینم 1.3 فیصد اضافے کے ساتھ 1,759.77 ڈالر فی اونس اور پیلیڈیم 1.4 فیصد بڑھ کر 1,330.26 ڈالر فی اونس پر پہنچ گیا۔
