سٹیٹ بینک آف پاکستان نے یکم جولائی 2026 کو بینک تعطیل کا اعلان کرتے ہوئے ملک بھر کے تمام بینکوں، مالیاتی اداروں اور مائیکرو فنانس بینکوں میں عوامی لین دین بند رکھنے کی ہدایت جاری کر دی ہے۔
میڈیا رپورٹس کے مطابق سٹیٹ بینک کی جانب سے جاری اعلامیے کے مطابق یکم جولائی بروز بدھ بینک تعطیل کے باعث صارفین کے لیے بینکنگ خدمات اور کاؤنٹرز پر لین دین معطل رہے گا۔ تاہم بینکوں، ترقیاتی مالیاتی اداروں اور مائیکرو فنانس بینکوں کے ملازمین معمول کے مطابق اپنے دفاتر میں موجود رہیں گے اور اندرونی و دفتری امور سرانجام دیں گے۔
اعلامیے میں کہا گیا ہے کہ یہ تعطیل نئے مالی سال کے آغاز پر بینکوں کے حسابات اور مالی ریکارڈ کی تکمیل کے سلسلے میں دی جاتی ہے۔ اس دوران عوام کو بینک برانچز کے ذریعے نقد رقم کے لین دین، چیک کلیئرنس اور دیگر معمول کی بینکنگ سہولیات دستیاب نہیں ہوں گی۔
سٹیٹ بینک نے صارفین کو ہدایت کی ہے کہ وہ اپنے ضروری مالی معاملات اور بینکنگ لین دین یکم جولائی سے قبل مکمل کر لیں تاکہ کسی قسم کی دشواری کا سامنا نہ کرنا پڑے۔
واضح رہے کہ بینک تعطیل کے دن اے ٹی ایمز، موبائل بینکنگ اور انٹرنیٹ بینکنگ جیسی ڈیجیٹل سہولیات معمول کے مطابق دستیاب رہنے کا امکان ہے، تاہم بعض بینکوں کی جانب سے مخصوص سروسز کے اوقات میں فرق ہو سکتا ہے۔
