محکمہ جنگلی حیات خیبرپختونخوا نے ضلع باجوڑ کی تحصیل وارہ ماموند میں تیندوے کے غیر قانونی شکار کے افسوسناک واقعے کا سخت نوٹس لیتے ہوئے فوری تحقیقات اور ذمہ دار عناصر کے خلاف قانونی کارروائی کا آغاز کر دیا ہے۔
ضلع باجوڑ کے سرحدی علاقے سپرے، مندوگئی میں مقامی افراد نے ان کے پالتو جانوروں کو نشانہ بنانے والے ایک تیندوے کو مار دیا تھا، جس پر محکمہ جنگلی حیات نے فوری ایکشن لیا۔
ڈویژنل فارسٹ آفیسر وائلڈ لائف باجوڑ کی جانب سے جاری کردہ رپورٹ کے مطابق یہ واقعہ افغانستان کی سرحد سے متصل ایک انتہائی دشوار گزار اور دور افتادہ پہاڑی علاقے میں پیش آیا۔
محکمہ جنگلی حیات کے حکام کا کہنا ہے کہ نایاب جنگلی حیات کا تحفظ قانوناً لازمی ہے اور کسی کو بھی اس کی خلاف ورزی کی اجازت نہیں دی جا سکتی۔
یہ بھی پڑھیں: خیبرپختونخوا: مویشیوں کی انشورنس پالیسی کا آغاز، وجہ کیا بنی؟
واقعے میں ملوث ذمہ دار عناصر کا تعین کر کے ان کے خلاف وائلڈ لائف ایکٹ کے تحت سخت قانونی کارروائی عمل میں لائی جا رہی ہے۔
