ایپل نے اپنے صارفین کے لیے نئی فنانسنگ سہولت متعارف کرا دی ہے، جس کے تحت اب آئی فون، میک، آئی پیڈ اور ایپل واچ سمیت مختلف ڈیوائسز آسان ماہانہ اقساط پر حاصل کی جا سکیں گی۔
کمپنی نے اس نئی سہولت کے لیے سابقہ آئی فون اپ گریڈ پروگرام اور آئی فون پیمنٹ پلان کی جگہ ایپل اپ گریڈ پلان متعارف کرایا ہے، جس کا مقصد صارفین کے لیے جدید ایپل مصنوعات تک رسائی کو مزید آسان بنانا ہے۔
ایپل کے مطابق یہ پروگرام مالیاتی خدمات فراہم کرنے والی کمپنی Klarna کے تعاون سے شروع کیا گیا ہے۔ صارفین ایپل کی آفیشل ویب سائٹ، ایپل اسٹور ایپ یا کمپنی کے ریٹیل اسٹورز کے ذریعے اس سہولت کے لیے درخواست دے سکیں گے۔ درخواست کے بعد Klarna صارف کی اہلیت جانچنے کے لیے سافٹ کریڈٹ چیک کرے گی، جس سے کریڈٹ اسکور متاثر نہیں ہوگا۔
نئے اپ گریڈ پلان کے تحت بیشتر نئے آئی فون، میک، آئی پیڈ اور ایپل واچ ماڈلز لیز پر دستیاب ہوں گے، تاہم کچھ مصنوعات اس پروگرام میں شامل نہیں ہیں۔ ان میں آئی فون 16، آئی فون 16 پلس، ایپل واچ ایس ای، میک بک نیو، اے16 بیس ماڈل آئی پیڈ اور اسٹوڈیو ڈسپلے شامل ہیں۔
نئی اسکیم میں ایک اہم تبدیلی یہ کی گئی ہے کہ اب AppleCare+ ماہانہ قسط کا حصہ نہیں ہوگا۔ صارفین اگر اضافی تحفظ کی سہولت حاصل کرنا چاہیں تو انہیں یہ الگ سے خریدنی ہوگی۔ تاہم ایپل کارڈ کے ذریعے اقساط ادا کرنے والے صارفین کو روزانہ کی بنیاد پر 3 فیصد کیش بیک بھی دیا جائے گا۔
یہ بھی پڑھیں : پاکستان میں نئی MG ZS متعارف، قیمت اور فیچرز سامنے آ گئے
کمپنی نے مختلف ڈیوائسز کے لیے الگ الگ اقساط اور مدت مقرر کی ہے۔ آئی فون کے لیے 12 یا 24 ماہ کا پلان رکھا گیا ہے، جس کی ماہانہ قسط 17.99 ڈالر سے شروع ہوگی۔ ایپل واچ 12 یا 24 ماہ کی مدت کے ساتھ 11.99 ڈالر ماہانہ سے دستیاب ہوگی۔
اسی طرح میک کمپیوٹرز کے لیے 24 یا 36 ماہ کی لیز مدت رکھی گئی ہے، جس کی ماہانہ قسط 24.99 ڈالر سے شروع ہوتی ہے، جبکہ آئی پیڈ کے لیے بھی 24 یا 36 ماہ کا پلان موجود ہے اور اس کی ابتدائی ماہانہ قسط 11.99 ڈالر مقرر کی گئی ہے۔
ایپل کے مطابق لیز کی مدت مکمل ہونے کے بعد صارفین کے پاس تین آپشنز ہوں گے۔ وہ پرانی ڈیوائس واپس کرکے نیا ماڈل حاصل کرنے کے لیے نئی لیز شروع کر سکتے ہیں، باقی رقم ادا کرکے ڈیوائس مستقل طور پر خرید سکتے ہیں، یا پھر ڈیوائس واپس کرکے منصوبہ ختم کر سکتے ہیں۔
کمپنی کا کہنا ہے کہ ایپل اپ گریڈ پلان کا مقصد صارفین کو جدید ٹیکنالوجی کی حامل ڈیوائسز تک آسان اور لچکدار رسائی فراہم کرنا ہے۔
