بلوچستان کے ضلع خضدار میں سیکیورٹی فورسز نے خفیہ اطلاعات پر کارروائی کرتے ہوئےفتنہ الہندوستان کے 10 دہشت گردوں کو ہلاک کردیا جبکہ متعدد دہشت گردوں کے زخمی ہونے کی اطلاعات ہیں۔
سیکیورٹی ذرائع کے مطابق خضدار کے شور پرود کے پہاڑی علاقے میں فتنہ الہندوستان کی موجودگی کی اطلاعات پر سیکیورٹی فورسز نے انٹیلی جنس بیسڈ آپریشن کیا۔
کارروائی کے دوران دہشت گردوں کے مختلف ٹھکانوں کو گھیرے میں لے کر موثر کارروائی کی گئی۔
ذرائع کے مطابق سیکیورٹی فورسز اور دہشت گردوں کے درمیان شدید فائرنگ کا تبادلہ ہوا جس کے نتیجے میں 10 دہشت گرد ہلاک جبکہ متعدد زخمی ہوگئے۔
سیکیورٹی فورسز نے کارروائی کے بعد علاقے کو گھیرے میں لے لیا اور دہشت گردوں کی موجودگی کے ممکنہ مقامات کی تلاشی کا عمل شروع کردیا۔
سیکیورٹی ذرائع کا کہنا ہے کہ آپریشن کے بعد علاقے میں سرچ اینڈ کلیئرنس آپریشن مزید تیز کردیا گیا ہے تاکہ کسی بھی ممکنہ خطرے کا مکمل خاتمہ کیا جاسکے، فورسز کی جانب سے علاقے میں مشتبہ ٹھکانوں اور راستوں کی بھی کڑی نگرانی کی جارہی ہے۔
ذرائع کے مطابق سیکیورٹی فورسز نے دہشت گردی کے مکمل خاتمے تک کارروائیاں جاری رکھنے کے عزم کا اظہار کیا ہے جبکہ ملک میں امن و امان کے قیام اور عوام کے تحفظ کے لیے انٹیلی جنس اطلاعات کی بنیاد پرکارروائیاں آئندہ بھی جاری رہیں گی۔
