مدارس کے طلباء کے لیے لیپ ٹاپ اسکیم کا اعلان،مولانا طیب قریشی کا پشاور میں خطاب

مشیر اوقاف، مذہبی و اقلیتی امور مولانا طیب قریشی نے کہا ہے کہ پاکستان کے قیام، استحکام اور اس کی حفاظت میں علماء کرام اور دینی مدارس نے ہمیشہ نمایاں اور تاریخی کردار ادا کیا ہے۔ دینی مدارس کی افادیت سے کسی صورت انکار نہیں کیا جا سکتا تاہم عصرِ حاضر اور جدید دور کے تقاضوں سے ہم آہنگ ہونے کے لیے مدارس کے طلباء کو جدید علوم اور ٹیکنالوجی سے لیس کرنا وقت کی اہم ضرورت ہے۔

ان خیالات کا اظہار انہوں نے جمعیت طلبہ عربیہ کے زیر اہتمام پشاور میں منعقدہ ایک اہم سیمینار سے بطورِ مہمانِ خصوصی خطاب کرتے ہوئے کیا۔ اس سیمینار میں مفتی محمد اسماعیل، منتظم اعلیٰ جمعیت طلبہ عربیہ اعجاز الحق، مفتی محمد عسکر اور طلباء کی کثیر تعداد نے شرکت کی۔

تقریب سے خطاب کے دوران مولانا طیب قریشی نے ایک اہم اعلان کرتے ہوئے کہا کہ دینی مدارس کے طلباء کی استعدادِ کار بڑھانے اور انہیں جدید دور کے چیلنجز کا مقابلہ کرنے کے قابل بنانے کے لیے مختلف ترقیاتی منصوبے متعارف کرائے جا رہے ہیں۔

ان میں خاص طور پر مدارس کے طلباء کے لیے لیپ ٹاپ اسکیم بھی شامل ہے جس میں تمام تعلیمی و تدریسی مدارس بورڈز کو برابر کا حصہ دیا جائے گا تاکہ دینی طلباء بھی جدید ٹیکنالوجی سے بھرپور استفادہ کر سکیں۔

صوبے کی موجودہ امن و امان کی صورتحال پر بات کرتے ہوئے مشیر اوقاف کا کہنا تھا کہ خیبر پختونخوا میں دہشت گردی کے چیلنج سے انکار ممکن نہیں ہے تاہم اس ناسور سے نجات حاصل کرنے کے لیے پوری قوم کو سیاسی و مسلکی عصبیت سے بالاتر ہو کر متحد ہونا ہوگا۔

انہوں نے زور دیا کہ جنگیں اور بڑے معرکے قومیں تنہا نہیں بلکہ اجتماعی کوششوں، اتحاد اور باہمی تعاون سے جیتی جاتی ہیں کیونکہ امن کے بغیر ترقی کا تصور بے معنی ہے۔

مولانا طیب قریشی نے عزم ظاہر کیا کہ خیبر پختونخوا میں بین المذاہب اور بین المسالک ہم آہنگی کے فروغ کے لیے عملی اقدامات کیے جائیں گے تاکہ اس صوبے کو اس حوالے سے ایک مثالی ماڈل بنایا جا سکے۔

اس کے ساتھ ساتھ مساجد اور مدارس کے دیرینہ مسائل کے حل اور ان کی بہتری کے لیے حکومتی سطح پر بھرپور وسائل بروئے کار لائے جائیں گے۔

دینی مدارس کی اہمیت کو اجاگر کرتے ہوئے انہوں نے کہا کہ جو لوگ مدارس کی افادیت پر سوال اٹھاتے ہیں وہ دراصل ان کی حقیقی روح سے ناواقف ہیں۔

اس کو بھی پڑھیں : مولانا طیب قریشی کا محمود الحق حقانی کی تعزیت کیلئے حقانیہ کا دورہ

مدارس دینی تربیت کے بنیادی قلعے ہیں لیکن اپنے پیغام کو دنیا تک مؤثر انداز میں پہنچانے کے لیے فرسودہ سوچ سے نکل کر جدید علوم سے واقفیت حاصل کرنا ہوگی۔ قرآن کریم کی تعلیمات کی روشنی میں علم، تحقیق اور کردار سازی کے ذریعے ہی معاشرتی اصلاح کی منزلیں طے کی جا سکتی ہیں۔

سیمینار کے اختتام پر دیگر مقررین نے بھی بدلتے ہوئے دور میں مدارس کے فرائض پر روشنی ڈالی جبکہ تقریب کے آخر میں مشیر اوقاف مولانا طیب قریشی کو یادگاری شیلڈ بھی پیش کی گئی۔

Scroll to Top