نو منتخب امریکی مسلمان سینیٹر عبد الرحمان محمد السید نے امریکی خارجہ پالیسی اور ایران و مشرقِ وسطیٰ کے حوالے سے ملکی حکمتِ عملی کو شدید تنقید کا نشانہ بناتے ہوئے کہا ہے کہ ایران کے خلاف جنگ کا آغاز کرنا ایک تاریخی اور سنگین غلط فیصلہ تھا۔
امریکی ٹی وی کو دیے گئے اپنے ایک خصوصی اور سنسنی خیز انٹرویو میں سینیٹر عبدالرحمان محمد السید نے انکشاف کیا کہ امریکا اس وقت ایک ایسی غیر ضروری اور مہلک جنگ کی دلدل میں دھنس چکا ہے جو سرے سے شروع ہی نہیں ہونی چاہیے تھی۔
انہوں نے یاد دہانی کرائی کہ ماضی کے تمام امریکی صدور نے حکمتِ عملی کے تحت ایران کے خلاف راست جنگ سے گریز کیا، لیکن موجودہ اقدامات نے ملک کو خطرناک موڑ پر لا کھڑا کیا ہے۔
سینیٹر عبدالرحمان نے ایک غیر ملکی وزیراعظم کی جانب اشارہ کرتے ہوئے کہا کہ ایک غیر ملکی سربرہِ مملکت مسلسل امریکا کو ایران کے خلاف جنگ چھیڑنے پر اکساتا رہا ہے۔
انہوں نے پرزور مطالبہ کیا کہ امریکی حکومت کو چاہیے کہ وہ اسرائیل کے ساتھ بھی دیگر تمام عام ممالک کی طرح کا سفارتی اور سیاسی سلوک کرے اور اسے کوئی خصوصیت نہ دی جائے۔
انہوں نے انتہائی سخت الفاظ استعمال کرتے ہوئے کہا کہ امریکا اس وقت اسرائیل کو بھاری فوجی امداد اور جدید ترین جنگی ساز و سامان فراہم کر رہا ہے جبکہ حقیقت یہ ہے کہ اسرائیل کو فروخت کیا جانے والا یہی امریکی اسلحہ معصوم انسانوں کی نسل کشی (Genocide) کے لیے استعمال ہو رہا ہے جو انتہائی تشویشناک ہے۔
سینیٹر عبدالرحمان محمد السید نے بات چیت کو آگے بڑھاتے ہوئے کہا کہ انسانی حقوق کی سنگین خلاف ورزیوں پر مصر کو ملنے والی امریکی امداد کو بھی فوری طور پر بند ہونا چاہیے۔
انہوں نے واضح کیا کہ کسی بھی حکومت یا اس کی پالیسیوں پر تنقید کرنے کو اس ملک یا قوم کے خلاف تعصب یا بغض قرار دینا بالکل غلط اور غیر منطقی ہے۔
نو منتخب مسلمان سینیٹر کے اس جرات مندانہ انٹرویو اور واشگاف موقف کے بعد عالمی سیاست اور بالخصوص امریکی عوامی حلقوں میں ایک نئی بحث چھڑ گئی ہے۔
یہ بھی پڑھیں : گاڑی مالکان ہوشیار!خیبرپختونخوا حکومت کا جعلی نمبر پلیٹس کے خلاف کریک ڈاؤن کا فیصلہ
امریکی شہریوں اور انسانی حقوق کی تنظیموں نے سینیٹر عبدالرحمان کے موقف کی بھرپور حمایت کرتے ہوئے اسے حق اور سچائی کی آواز قرار دیا ہے۔
عوامی حلقوں کا کہنا ہے کہ امریکا کو ٹیکس دہندگان کے پیسے سے دنیا بھر میں جنگیں بھڑکانے اور ہتھیار سپلائی کرنے کا سلسلہ اب بند کرنا ہوگا اور ایوانِ بالا (سینیٹ) میں ایسے ہی بے باک رہنماؤں کی ضرورت تھی جو امریکی مفادات اور عالمی امن کے لیے سچی بات کر سکیں۔
