پاکستان سپر لیگ (PSL) سیزن 11 کے 38ویں میچ میں لاہور قلندرز نے پشاور زلمی کو ایک انتہائی سنسنی خیز مقابلے کے بعد 6 وکٹوں سے زیر کر لیا ہے۔
لاہور کے قذافی اسٹیڈیم میں کھیلے گئے میچ میں پشاور زلمی کی جانب سے دیے گئے 200 رنز کے بھاری ہدف کو قلندرز نے اپنی جارحانہ بیٹنگ کی بدولت آخری اوور میں 4 وکٹوں کے نقصان پر حاصل کیا۔
پشاور زلمی نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 4 وکٹوں پر 199 رنز کا بڑا مجموعہ ترتیب دیا۔
زلمی کی جانب سے مائیکل بریسویل نے قلندرز کے باؤلرز کو آڑے ہاتھوں لیا اور 83 رنز کی جارحانہ اننگز کھیلی، جبکہ کپتان بابر اعظم نے 59 رنز کی ذمہ دارانہ باری سے ٹیم کو سہارا دیا۔
افتخار احمد 27 رنز کے ساتھ ناقابلِ شکست رہے۔لاہور کی جانب سے شاہین آفریدی اور حارث رؤف نے 2،2 وکٹیں حاصل کر کے رنز کی رفتار کو قابو میں رکھنے کی کوشش کی۔
ہدف کے تعاقب میں لاہور قلندرز کے بلے بازوں نے شروع سے ہی پراعتماد انداز اپنایا۔ فخر زمان نے 58 رنز کی ناقابلِ شکست اننگز کھیل کر جیت کی بنیاد رکھی، جبکہ عبداللہ شفیق نے 25 اور چارتھ اسالنکا نے 33 رنز کے ساتھ ٹیم کے مجموعے کو آگے بڑھایا۔
میچ کے اختتامی لمحات میں سکندر رضا کے 29 اور ڈینیل سیمز کے 35 رنز نے قلندرز کا پلڑا بھاری کر دیا اور ٹیم نے 19.3 اوورز میں ہدف عبور کر لیا۔
زلمی کے باؤلرز خرم شہزاد، افتخار احمد، علی رضا اور سفیان مقیم ایک ایک وکٹ لینے میں تو کامیاب رہے مگر قلندرز کے طوفانی حملے کو روکنے میں ناکام رہے۔
