پاکستان سپر لیگ (پی ایس ایل) الیون کے لیے پاکستان کرکٹ بورڈ (پی سی بی) نے انعامی رقم کا باضابطہ اعلان کر دیا ہے، جس کے بعد ٹورنامنٹ کی اہمیت اور بھی بڑھ گئی ہے۔
اعلان کے مطابق پی ایس ایل 11 کی فاتح ٹیم کو پہلی بار 5 لاکھ امریکی ڈالر کی خطیر انعامی رقم دی جائے گی، جو لیگ کی تاریخ کی سب سے بڑی رقم قرار دی جا رہی ہے۔ رنرز اپ ٹیم کے لیے 3 لاکھ امریکی ڈالر مختص کیے گئے ہیں۔
اس کے علاوہ بہترین پلیئر ڈیولپمنٹ فرنچائز کو بھی 2 لاکھ امریکی ڈالر کا خصوصی انعام دیا جائے گا، جبکہ کھلاڑیوں کے درمیان تقسیم ہونے والی مجموعی انعامی رقم 5 لاکھ امریکی ڈالر مقرر کی گئی ہے۔
پی سی بی حکام کے مطابق انعامی رقم میں اضافہ لیگ کے معیار، مقابلے اور دلچسپی کو مزید بڑھانے کے لیے کیا گیا ہے۔ اس اقدام سے نہ صرف کھلاڑیوں کی کارکردگی میں نکھار آنے کی توقع ہے بلکہ شائقین کے لیے بھی پی ایس ایل 11 مزید سنسنی خیز ثابت ہوگا۔
