کاشف عزیز
پشاور کے علاقے دلہ ذاک روڈ گل آباد میں سلنڈر ریفلنگ کی دکان میں نامعلوم وجوہات کی بنا پر اچانک آگ بھڑک اٹھی جس نے تیزی سے پھیلتے ہوئے سلنڈر ریفلنگ کی دکان سمیت دیگر قریبی دکانوں کو بھی اپنی لپیٹ میں لے لیا۔
واقعے کی اطلاع ملتے ہی ریسکیو 1122 کی 3 فائر وہیکلز اور 2 ایمبولینسز فوری طور پر جائے وقوعہ کی جانب روانہ کر دی گئیں۔
ریسکیو اہلکاروں نے موقع پر پہنچ کر امدادی کارروائیوں کا آغاز کیا اور پیشہ ورانہ مہارت کا مظاہرہ کرتے ہوئے آگ پر مکمل قابو پا لیا، جس کے بعد کولنگ کا عمل جاری ہے۔
اس افسوسناک واقعے میں دکان کے اندر موجود دو بچے اور ایک شخص معمولی جھلس کر زخمی ہوئے جنہیں ریسکیو اہلکاروں نے ابتدائی طبی امداد فراہم کرنے کے بعد فوری طور پر قریبی ایم ایم سی اسپتال رنگ روڈ منتقل کر دیا ہے۔
فائر فائٹرز کی بروقت کارروائی کے باعث آگ کو مزید پھیلنے اور بڑے پیمانے پر جانی و مالی نقصان ہونے سے بچا لیا گیا ہے۔
