کامران علی شاہ
صوبائی دارالحکومت پشاور کے مضافاتی علاقے سب ڈویژن حسن خیل میں دیسی ساختہ بارودی مواد کو ناکارہ بنانے کے دوران ہونے والے دھماکے میں بم ڈسپوزل اسکواڈ کا ایک اہلکار شہید ہو گیا ہے۔
تھانہ حسن خیل کی حدود میں سڑک کنارے نصب آئی ای ڈی کی موجودگی کی اطلاع ملنے پر بم ڈسپوزل اسکواڈ کی ٹیم فوری طور پر موقع پر پہنچی تھی۔
پولیس حکام نے بتایا کہ بم ڈسپوزل اسکواڈ کے اہلکار خائستہ رحمان جائے وقوعہ پر موجود بارودی مواد کو ناکارہ بنانے کی کوششوں میں مصروف تھے کہ اسی دوران آئی ای ڈی اچانک زوردار دھماکے سے پھٹ گئی۔ دھماکے کے نتیجے میں اہلکار خائستہ رحمان شدید زخمی ہوئے اور زخموں کی تاب نہ لاتے ہوئے موقع پر ہی جامِ شہادت نوش کر گئے۔
واقعے کے فوری بعد پولیس اور سیکیورٹی فورسز کی بھاری نفری نے جائے وقوعہ پر پہنچ کر پورے علاقے کو گھیرے میں لے لیا اور شواہد اکٹھے کرنے کا عمل شروع کر دیا ہے۔
یہ بھی پڑھیں : خیبرپختونخوا حکومت کا سرکاری ملازمین کےلیے بڑا فیصلہ،ہاؤس ریکوزیشن الاؤنس کی منظوری
پولیس اور سیکیورٹی فورسز کی جانب سے علاقے میں سرچ آپریشن بھی جاری ہے تاکہ کسی بھی ممکنہ خطرے کا خاتمہ کیا جا سکے جبکہ واقعے کی مختلف پہلوؤں سے تحقیقات اور ذمہ دار عناصر کے تعین کے لیے کارروائی کا آغاز کر دیا گیا ہے۔
