سینئر صحافی طارق آفاق نے دعویٰ کیا ہے کہ خیبرپختونخوا میں گورنر راج کے نفاذ کے حوالے سے اعلیٰ سطح پر مشاورت مکمل کرلی گئی ہے اور اس سلسلے میں پاکستان پیپلزپارٹی کی جانب سے بھی گرین سگنل مل چکا ہے۔
طارق آفاق کے مطابق وزیراعلیٰ خیبرپختونخوا سہیل آفریدی کے خلاف چارج شیٹ بھی حتمی طور پر تیار کرلی گئی ہے اور اتوار تک گورنر راج کا باقاعدہ اعلامیہ جاری ہونے کا قوی امکان ہے۔
سوشل میڈیا پلیٹ فارم ایکس پر اپنے بیان میں طارق آفاق نے انکشاف کیا کہ گورنر خیبرپختونخوا فیصل کریم کنڈی کی جانب سے صوبے کی موجودہ امن و امان اور انتظامی صورتحال پر ایک جامع رپورٹ وفاق کو ارسال کی گئی تھی جس کے بعد اس معاملے پر پیش رفت تیز ہوئی۔
بریکنگ نیوز
خیبر پختونخوا میں گورنر راج،پیپلزپارٹی نے بھی حامی بھر لی۔
صدر مملکت آصف علی زرداری کی اہم شخصیات کے ساتھ ملاقاتوں میں آئینی راستے کے استعمال پر اتفاق۔
بلاول بھٹو کابھی آئینی و قانونی مشاورت کے بعد گرین سگنل۔
گورنر خیبر پختونخوا نے جامع رپورٹ ارسال کردی۔
سہیل آفریدی… pic.twitter.com/SL2kq0WG4N— Tariq Afaq (@tariqafaq) September 30, 2026
ان کا کہنا تھا کہ صدر مملکت آصف علی زرداری کی اہم شخصیات سے ہونے والی حالیہ ملاقاتوں میں آئینی راستے کے استعمال پر مکمل اتفاق کیا گیا ہے جبکہ پیپلزپارٹی کے چیئرمین بلاول بھٹو زرداری نے بھی آئینی و قانونی ماہرین سے تفصیلی مشاورت کے بعد فیصلے کی توثیق کر دی ہے۔
طارق آفاق کے مطابق تمام آئینی اور قانونی امور طے پانے کے بعد آئندہ چند روز میں اہم سیاسی پیش رفت متوقع ہے۔
یہ بھی پڑھیں : خیبر پختونخوا پولیس میں تبادلے اور تعیناتیاں، نوٹیفکیشن جاری
واضح رہے کہ گورنر خیبرپختونخوا فیصل کریم کنڈی خود بھی حالیہ دنوں میں گورنر راج کے حوالے سے مشاورت کی تصدیق کر چکے ہیں جبکہ وفاقی حکومت کی جانب سے بھی صوبے میں ایمرجنسی یا گورنر راج کے امکانات سے متعلق بیانات سامنے آتے رہے ہیں۔
